បច្ចុប្បន្ន លោក អានសាន គឺជាអនុប្រធានមន្ទីរសារការីសេដ្ឋាវិទូនៃព្រះរាជាណាចក្រកម្ពុជា និងជាសមាជិកគណៈកម្មាធិការកណ្តាលនៃសហភាពសហព័ន្ធយុវជនកម្ពុជា។
បន្ថែមពីលើភារកិច្ចខាងលើ លោកក៏មានមុខងារជាជំនួយការឯកឧត្តម ហ៊ុន ម៉ានី សមាជិករដ្ឋសភានីតិកាលទី៥, ជាតំណាងរាស្ត្រមណ្ឌលកំពង់ស្ពឺ និងជាប្រធានសហភាពសហព័ន្ធយុវជនកម្ពុជា។ លោកមានបទពិសោធន៍ការងារជាង ១០ ឆ្នាំកន្លងមក ក្នុងវិស័យច្បាប់ សេដ្ឋកិច្ច គោលនយោបាយ និងការបោះឆ្នោត។
ពីឆ្នាំ ២០១០ ដល់ ២០១៣ លោកជាមន្ត្រីច្បាប់ និងក្រឡាបញ្ជី នៃអង្គជំនុំជម្រះវិសាមញ្ញក្នុង តុលាការកម្ពុជា ឬហៅកាត់ថា តុលាការកាត់សេចក្តីមេដឹកនាំខ្មែរក្រហម ទាំងក្នុងការតាក់តែង ដីកាដំណោះស្រាយបញ្ជូនទៅជំនុំជម្រះ និងក្នុងដំណើរការកាត់សេចក្តីមេដឹកនាំខ្មែរក្រហមទាំងបួនរូប។ លោកក៏ធ្លាប់ជាទីប្រឹក្សាពិគ្រោះយោបល់ ផ្នែកច្បាប់ សេដ្ឋកិច្ច និងគោលនយោបាយដល់ ស្ថានទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជានៅឆ្នាំ ២០០៩។ ទន្ទឹមនឹងគ្នានេះ លោកក៏ជាមន្ត្រីស្រាវជ្រាវ ជាតិផ្នែកសេដ្ឋកិច្ច-សង្គម ដែលបានធ្វើដំណើរជាច្រើននៅទូទាំងព្រះរាជាណាចក្រកម្ពុជា និងឆ្លៀតពេលវេលាចែករំលែក បទពិសោធន៍ជាគ្រូបង្រៀនឧត្តមសិក្សា កម្រិត បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង នៅតាមសកលវិទ្យាល័យជាតិមួយចំនួន នៅរាជធានីភ្នំពេញ និងនៅតាមបណ្តាខេត្ត។
លោក អានសាន ទទួលបានបរិញ្ញាបត្រជាន់ខ្ពស់ (Master) ជំនាញសេដ្ឋកិច្ចគោលនយោបាយ និងអភិវឌ្ឍន៍ពីមហាវិទ្យាល័យ Williams College សហរដ្ឋអាមេរិច (២០០៩) បន្ថែមពីលើបរិញ្ញាបត្រជាន់ខ្ពស់ជំនាញសេដ្ឋកិច្ចសង្គមនិងអភិវឌ្ឍន៍ពីរាជបណ្ឌិត្យសភាកម្ពុជា (២០០៣) បរិញ្ញាបត្រច្បាប់ (នីតិឯកជន) ពីមហាវិទ្យាល័យ នីតិសាស្ត្រ និងវិទ្យាសាស្ត្រសេដ្ឋកិច្ច (២០០១) និងបរិញ្ញាបត្រគ្រប់គ្រងអាជីវកម្ម (ជំនាញគ្រប់គ្រង) ពីវិទ្យាស្ថានជាតិគ្រប់គ្រង (២០០០) នៅរាជធានីភ្នំពេញ។
លោកជាសមាជិកសហភាពសហព័ន្ធយុវជនកម្ពុជា ពីឆ្នាំ ២០១១។
ភាសា៖ ខ្មែរ (កំណើត), អង់គ្លេស (ល្អ) និងភាសាបារាំង (បន្តិចបន្តួច)។
ព័ត៌មានផ្ទាល់ខ្លួន៖ លោក ដាវ អានសាន ភេទ ប្រុស កើតឆ្នាំ ១៩៧៩ ទីកន្លែងកំណើត ខេត្តកំពង់ចាម កម្ពស់ ១,៧៣ ម ទម្ងន់ ៧៤ គក សុខភាពល្អ។